सावन के महीना

महीना सावन के आगे रे संगी, महीना सावन के आगे । 

नदिया, नरवा, खेत- खार जम्मो कोती हरीआगे ।। 

टेटका - मेचका टरर टरर, येती ओती नरियावत हे। 

होगे बियासी धान- पान, लहर लहर लहलहावत हे ।। 

ये सावन के महीना मा छ.ग. के, पहली तिहार घलो लगठियावात हे । 

हरेली तिहार के चिला रोटी घलो, महर महर ममहावत हे।। 

हरेली के तिहार मा साबो , अपन चिखलाय नांगर ला धोवत हे । 

पानी कांजी गिरत नई हे, किसान मन टुकुर टुकुर देखत हे ।।

सावन महीना भर छत्तीसगढ़ के , तिहार ले भरे हे ।

जम्मो बहिनी मन राखि बनाय, भाई मन के अगोरा मा खड़े हे ।।

आठ दिन के बाद , आठे कन्हैया घलो आगे हे ।

ढोल नंगारा नंदागे रे संगी, बैंड बाजा अऊ डीजे हा छागे हे ।।

भोले बाबा के भगत मन, बोल बम बोल बम चिल्लावत हे ।

श्रद्धा भक्ति ले मनोकामना लेके , बाबा के दुवारी मा जावत हे ।।

सबो के मन गदगद होगे ,

भोले बाबा के परसाद ला पाके ।

बड़ा निक लागे संगी, सावन के महीना आगे सावन के महीना आहे ।।