आगे- आगे कमरछठ तिहार---

💐आगे- आगे कमरछठ तिहार---

---------------////-----------------

आगे-आगे, कमरछठ तिहार,

दीदी ओ मोला निक लागत हे ।

आगे-आगे,बेटी -बेटा के तिहार,

दीदी ओ मोला निक लागत हे,

दीदी ओ मोला निक लागत हे--$-

बेटी -बेटा के खातिर रहिबो उपास-2

अपन दुख पीरा कहिबो प्रभु के पास-2

बने रखबे मोर घर संसार---दीदी ओ--

सगरी बनागे के हमन,पानी ल चढाबो-2

नारियर फूल पान,भोले बबा म चढाबो-2

फेर कहानी सुनबो मन विचार--दीदी ओ--

छै किसिम के भाजी,टोरबो निमारबो--2

लाई ,अउ मौहा ल,भोग तोर लगाबो--2

संग म चना ल देबो हमन डार--दीदी ओ--

तेंदू के पतरी,भैंसी के दूध दही--2,

सगरी कस गहिर मति रखहू बही--2,

भाईचारा के राखहू सब बिचार--दीदी ओ--

बेटी -बेटा, देबे तेहा, मोर कोरा--2,

तोला चढ़ाहूँ,मेंहा नरियर जोड़ा--2,

मोरो जिनगी म आ जाए बहार--दीदी ओ--

पिंवरी छुही के पोता,लइका ल लगाबो--2

बैरी दुश्मन के नजर ले,वोला बचाबो--2

मनभरहा हमन देबोंन,या दुलार--दीदी ओ--

रचनाकार:--श्रवण कुमार साहू,